Patujolo:

Jumolo hami Pimpinan dohot Parhobas di Kantor Pusat ni Hurianta pasahathon tu hamu amanami, inanami, Pandita, Evangelist, Majelis Pusat, Vorganger, Sintua dohot sude ruas ni Hurianta “Selamat Taon Baru ma di hamu saluhutna.”

“Puji ma Jahowa, ale tondingku,  jala  nasa rohangku  di bagasan mamuji goarna na badia i. Puji ma Jahowa, ale tondingku, jala unang tung halupahon denggan ni basana sudena. Ibana do manesa dosam sudena, Ibana pamalum angka  sahitmu sudena. Ibana paluahon ngolum sian hamagoan, Ibana martumpalhon tu ho denggan basa dohot asi ni roha” (Psalm 103:1-4).

Songon pamujion ni par-Psalm i ma nang pamujionta tu Debatanta, ai Ibana do na marmudumuduhon ngolunta umbahen na boi hita taripar tu taon na imbaru on.

Nuaeng, dalananta ma taon 2024 on, ragam angka na masa na naeng sibolusonta tu joloan on. Sipata suhar do I tu pingkiran nang tu angka sangkapta, na mambahen hita manjua di panoguon ni Debata. Alai ndang toguon ni  Debata  hita tu  hamagoan, naeng toguonNa do hita tahe tu hasonangan dohot hangoluan na manongtong (pat. Jeremia 29:11). Alani I, di bona ni taon on disosoi do hita, asa:

TEMA: TAOLOI MA PANOGUNOGUON NI DEBATA

1. Nang Pe Godang Hamaolon Siadopanta

   Di Padan na Robi, torang do disurathon Hata ni Debata taringot tu panjouonNa tu angka na porsea. Isara si Abraham, dijou jala dipapulik Debata do ibana sian tano hatubuanna tu luat na so hea binotona. Dipanjouonna I, ndang lias si Abraham sian angka hamaolon nang parungkilon na niadopanna. Songon i do na niadopan ni si Josep dohot si Maria uju di hatutubu ni Tuhan Jesus. Maporus do nasida tu luat  Misir hombar tu na tinonahon ni surusuruan ni Tuhan I tu nasida. Ai disangkapi si Herodes do naeng mambunu Tuhan Jesus. Dietong rohana do hatutubu ni Sipalua I naeng manggantihon ibana gabe raja di harajaon Judea. Molo tarajumi na niadopan ni si Josep dohot si Maria hatiha I, ndang hapalang hansitna na niae nasida. Sasintongna ingkon sipaturetureon dope posoposo I nang inana si Maria, jala na gale dope pamatangna, alai ingkon hehe maporus tu tano Misir. Tung borat do siadopannasida ingkon mardalan nasida sian Betlehem tu tano Misir 438 Km daona, hirahira pardalanan 30 ari lelengna asa sahat.

   Hinorhon ni pingkiran ni si Herodes na jahat, gabe manusai di ngolu nasida nang angka natorop di Betlehem dohot na humaliang. Sude ina mangangguhi, pola dipatudos songon si Rahel na so olo be apulon (ayat 18). Ai disuru do naposona mambunu angka dakdanak baoa na marumur dua taon ro di angka na ummetmet sian i, ala so jumpangsa posoposo Jesus (ayat 16). Songon I ma na jotjot masa di ngolu ni jolma na sala mangantusi sangkap ni Debata di portibi on, sai dirimpu do harajaon batu harajaonna di portibi on. Molo tung pe diloas Debata hita marharajaon, unang gabe patubu  ginjang ni  roha jala pangambati di sangkap ni Debata. Nang di tongatonga ni huria, jotjot do jumpang pangalaho na songon i, na mambahen sega huria ni Tuhanta. Torop na mangarajumi dirina gabe angka sipungka huria, jala na sai naeng manggolom huria i. Ndang pos rohana di donganna atik pe sasintongna ndang tuk be gogona laho manguluhon di huria I. Nang di ngolunta nuaeng, diloas Debata do masa hamaolon na jotjot mangambati pardalananta. Na mardalan dope hita di portibi on, laho mandapothon sambulo ni tondinta, I ma surgo I (Pilipi 3:14). 

   Sipata diloas Debata do songgop parsahiton, haraparon, hasusaan, porang, parbadaan, nang angka pangaleleon dohot angka parpoda haliluon na mambahen hita marhagaleon, marsak jala mandele. Jala halak na mandele mura do lilu haporseaonna, asa godang do halak na gabe mangihuthon debata na asing manang ugamo na asing hinorhon ni i. Ai margogo do sibolis mangelaela hita, dipatudos do ibana songon babiat na marauang mangalului sibondutonna (1 Petrus 5:8). Di taon 2024 on, manang songon dia pe ragam ni hamaolon na naeng siadopanta, sotung olo hita mandele. Pos ma rohanta di Debata jala taoloi ma panogunoguonNa.

2.  Ai Naeng Pasonangonna do Hita

   Diboto Debata do tahi na jahat na naeng patupaon ni si Herodes tu Tuhan Jesus. Siala ni disuru do surusuruanNa mamangkulingi si Josep marhitehite nipi na mandok; “Hehe ma ho, boan ma dakdanak I rap dohot inana I, maporus ma hamu tu tano Misir; disi ma hamu jolo, paima ro muse hatangku, ai na naeng luluan ni si Herodes do Dakdanak I asa bunuonna” (ayat 13). Sasintongna ndang na mabiar Debata mida si Herodes umbahen na disuru nasida maporus tu tano Misir laho pasidingkon sangkap ni si Herodes. Alai asa saut do songon naung sinurirangkon panurirang I na mandok; “jala sian Misir do hujou anakhi” (Hosea 11:1b).

   Tabereng ma cara ni Debata manogunogu si Josep dohot si Maria pasidingkon sangkap ni si Herodes na jahat I. Ditogutogu do nasida nang di pardalanan sahat tu tano Misir. Disarihon Debata do di nasida bohal saleleng di pardalanan tolu pulu ari lelengna. Molo tung pe ingkon gadisonnasida sere, haminjon dohot miak na hushus na pinasahat ni halak na sian purba I, cara ni Debata do I manarihon angka na manghaposi Ibana. Hirahira pitu taon lelengna si Josep dohot si Maria maringan di tano Misir. Songon halak dagang do nasida disi na berjuang laho mangalului sipanganon laho manguduti ngolunasida. Alai dipargogoi Debata do si Josep dohot si Maria, asa singkop do sude sipangkeon nasida siganup ari.

   Molo tarajumi, tontu suhar do dipanghilalaan ni si Josep dohot si Maria parsuru ni Debata tu nasida. Alai ndang manjua nasida disi, dioloi do panogunoguon ni Debata di nasida. Hata ni Debata mandok; “Alai taboto do saluhutna do manumpak tu na denggan di angka na marholong ni roha di Debata, angka na jinouNa sian tahiNa hian” (Rom 8:28). Taon on, digoari do Pesta Demokrasi di bangsonta on. Di pesta on, naeng pillitonta ma Presiden, anggota Legislatif dohot Kepala Daerah. Tontu ndang boi sarupa sude pilihan, alai unang ma nian hinorhon ni I gabe masa pargutugutuon di hita tarlumobi ma di tongatonga ni hurianta. Taloas ma Debata mangula di rohanta manogunogu hita, asa tongtong sada di bagasan holong na sian Tuhan I.

3. Antong Taoloi Ma Panogunoguon ni Debata

   Molo tapamanat di pardalanan ni si Josep dohot si Maria, tontu godang na naeng mangambati pardalanannasida. Tarjalo roha do I, ai ndada huta na tinanda jala na hea ditopot huta I. Alai na marpos ni roha do nasida di panogunoguon ni Debata umbahen na saut na sinangkapan ni Debata di nasida.

   Nang di pardalanan ni ngolunta di hasiangan on sahat tu ari sogot. Haposan do Ibana manogunogu hita, jala tuk do  gogona dohot huasona paluahon hita sian ragam ni hamaolon siadopanta. Nunga digonopi  Debata bagabagaNa  marhitehite  hatutubu ni Jesus Kristus, Sipalua I. Ibana do naung paluahon hita sian dosa nang hamatean salelenglelengna I.

   Alani I, unang ganggu rohanta dipanogunoguon ni Debata. Di bona ni taon on 2024 on, manang tudia pe hita mangalangka, jala manang aha pe nasinangkapanta tongtong ma tapatutoru rohanta maradophon Ibana jala taloas Ibana manogunogu hita. Dipasupasu Tuhan Debata ma hamu saluhutna. Amen

   Selamat Tahun Baru ma di hita Saluhutna.

Disurathon: Pdt. Jon Albert Saragih, M.Th

(Bishop  GKLI)